Eftir at AB hevði tapt ein og spælt tveir javnleikar í venjingardystunum fyrr í ár, vóru menn uppsettir uppá at fáa fyrsta sigurin í ár móti HB.

Dysturin byrjaði væl fyri AB tí longu í 5 minutti kundi Martin Midjord leggja AB á odda 0 - 1. Málið kom eftir at Jákup Dam hevði havt eina roynd móti málið og endaði bólturin hjá Martin sum gjørdi skjótt av og setti bóltin í málið.

Eftir at AB hevði skora vakknaði HB og longu í 9 minutti javnaði Johan Eivind Mouritsen eftir at verjan hevði verið eitt sindur passiv.

Næstu 20 minuttirnar fekk AB ein forsmakk uppá hvat kann henda um ikki allir geva seg fult út á vøllinum í 1. deild. HB hevði hesa løtuna lætt spæl og var tað til tíðir sera gott spæl frá HB´sa síðu. Meðan tað hinvegin ikki gekk væl hjá AB, sum var rakt av nógvum persónligum feilum og passivum spælið.

HB legði seg á odda í 23 minutti og 17 minuttir seinni í 40 minutti kundi HB leggja seg á odda 3 - 1 uppá brotsspark. Øll málini hjá HB vóru gjørd av góða framherjanum Johan Eivind Mouritsen.

Tað síðsta málið var ergiligt tí AB var við at spæla seg inn aftur í dystin, men í 44 minutti kundi Jobin Drangastein minka um munin til 2 - 3. Hetta gav góðar vónir til seinna hálvleik og vóru allir menn samdir um at innsatsurin skuldi vera betri í seinna hálvleika og at arbeiðast skuldi fram móti einum sigri.

Tað var tí gleðiligt at AB longu í 52 minutti fekk javna við einum sera góðum málið av Danny Rasmussen, sum var spældur leysur av verjuni við einari langari sending av málverjanum Heðin Stenberg.

Hesa løtuna gekk væl hjá AB og í 62 minutti kundi Gunnar Haraldsen leggja AB á odda 3 - 4 eftir at hann var farin framvið í álop. Gunnar fekk bóltin inni í brotsteiginum í vinstra borði, trekti til høgru og sneiddi ein HB´ara av og legði bóltin tyrgt í netið - sera gott mál.

Sjálvt um AB nú spældi mera direkta og útnyttaði sínar møguleikar, so sást sjánligt at HB hevði eitt sera gott bóltleikandi lið. HB kom nú eina løtu inn aftur í dystin og í 67 minutti javnaði HB eftir horna.

Ab helt tó framá við at spæla og í 73 minutti kundi vetereanurin Hans Jacob Thomsen leggja AB á odda eftir at Bogi á Borg hevði sent eitt fríspark innfyri.

Fleiri mál komu ikki í dystinum, hóast AB hevði einari 2 - 3 naskar royndir á málið avtrat við Jákupi Dam.

Alt í alt kann sigast sigurin var góður í dag sjálvt um spæli til tíðir ikki hekk so væl saman - hetta fer at koma teir næstu tveir venjingardystirnar áðrenn landskappingin byrjar.

Hagtøl frá dystinum:

HB - AB  4 - 5 (3 - 2):

0 - 1 Martin Midjord, 5 min

1 - 1 Johan Eivind Mouritsen, 9 min

2 - 1 Johan Eivind Mouritsen, 23 min

3 - 1 Johan Eivind Mouritsen, 40 min

3 - 2 Jobin Drangastein, 44 min

3 - 3 Danny Rasmussen, 52 min

3 - 4 Gunndar Haraldsen, 62 min

4 - 4 ?, 67 min

4 - 5 Hans Jacob Thomsen, 73 min

Liði:

Heðin Stenberg - Bartal Højgaard (Alexandur Samuelsen, 46 min), Teitur Jóanesarson, Bernhard Petersen (Esben Debess, 70 min), Gunnar Haraldsen (Martin Midjord, 75 min)- Brandur Heinason (Hans J Thomsen, 46 min), Sjúrður Ellefsen, Martin Midjord (Fróði Stenberg, 46 min), Jobin Drangastein, Bogi á Borg - Jákup Dam (Danny Rasmussen, 46 min/Jakup Dam, 75 min)

Dagsins leikari:

Jobin Drangastein, 7 stig

Sjúrður Ellefsen, 4 stig

Heðin Stenberg, 2 stig

Teitur Jóanesarson, 1 stig

1. deild menn hjá AB spældu sín 3 venjingardyst í ár móti besta liðnum hjá FC Hoyvík.

Dysturin var til tíðir væl spældir og endaði dysturin við einum javnleiki 1 - 1.

Eins og í dystinum móti EB/Streymi var fyrr hálvleikur ikki væl spældur hjá AB. Hóast spælið ikki reiðiligani hekk saman so hevði AB nøkur góð álop, men var tað FC Hoyvík sum kundi leggja seg á odda  í 24 minutti.

Hesa løtuni hekk spælið ikki saman hjá AB - ov langt var millum keturnar og vóru mennirnir ikki neyvir í nærdystunum. Somuleiðis var hugflogið at kalla burtur í uppspælinum, sum var ov stirvið og seint.

Sum hálvleikurin leið spældi AB seg betur inn í dystin og í 43 minutti var Jákup Dam spældur leysur og á veg inn í brotsteigin var hann feldur av málmanninum. Dómarin ivaðist ikki og peikaði á brotssparksblettin. Martin Midjord var settur at skjóta og misnýtti hann henda møguleika at javna fyri AB - AB fór tí til hálvleiks við einum 0 - 1 úrslitið.

Eftir at venjarin hevði tosa við stórum stavum í halvleikinum og gjørt 5 útskiftingar, kom heilt vend í dystinum. AB stýrdi tí mesta spælinum og byrjaði álopsparturin nú at virka. Lonu í 48 minutti fekk AB eitt hornaspark sum Dion Splidt var settur at taka. Dion sendi eina góða avlevering innfyri í brotsteigin og har var veteranurin Bernhard Petersen hægstur og stútaði bóltin knallhart í netið uttan møguleika hjá málmanninum at taka bóltin.

AB helt áfram við at pressa og fekk liði fleiri málmøguleikar avtrat. Tann størsti fekk Dion Splidt tá hann var spældur púra fríður í feltinum og í staðinfyri at trilla bóltin í málið við handari stong, leyp hann í felluna hjá málmanninum sum lokkaði hann at skjóta við nærmastu stong og so var hasin málmøguleikin spiltur.

Hóast AB helt áfram við at spæla góðan fótbólt komu ikki fleiri málí dystinum og mátti AB tí taka til takkar við tí næsta javnleikinum í trekk.

Næsti dystur verður mikukvøldi kl. 18 móti HB í Gundadali.

AB vs. FC Hoyvík 1 - 1 (0 - 1):

0 - 1 ?, 24 min

1 - 1 Bernhard Petersen, 48 min

Liði:

Heðin Stenberg - Niels Johansen (Teitur Olsen, 46 min), Teitur Jóanesarson, Gunndar Haraldsen (Bernhard Petersen, 46 min), Bartal Højgaard (Alex ?, 46 min) - John Hansen (Gunnar Haraldsen, 70 min), Fróði Stenberg (Bogi á Borg,46 min), Martin Midjord (Oddmar Jacobsen, 46 min), Sjúrður Ellefsen, Dion Splidt (Fróði Stenberg, 70 min) - Jákup Dam (Dan Petersen, 46 min)